‫الرئيسية‬ جوووول دروس مستفادة من خروج برشلونة من دوري الأبطال
جوووول - أبريل 12, 2018

دروس مستفادة من خروج برشلونة من دوري الأبطال

1- اليأس خيانة: أول وأهم درس ممكن نتعلمه من ماتش العودة بتاع روما وبرشلونة هو عدم اليأس … تخيل لو كان فريق روما كمدرب ولاعيبة وجمهور كان تملكهم اليأس؛ فهما بيلاعبوا برشلونة اللي متصدر الدوري الاسباني وماخسرش ولا ماتش فيه لحد دلوقتي وكمان خسرانين منهم في الذهاب 4/1 ودي نتيجة ممكن ناس كتير يشوفوها انها كبيرة وصعب تتعوض خصوصاً انك بتلعب قدام واحد من أقوى 4 فرق في أوروبا وكمان عندهم واحد من أفضل اللاعيبة في التاريخ واللي قادر يرجح كفة فريقه في أي وقت، ولكن ما فكروش في كل اللي فات ده وآمنوا بقدرتهم وبفرصتهم في الصعود وبالفعل الحلم اتحقق وصعدوا.

 

 

2- إياك والغرور: واحد من أهم أسباب خروج برشلونة امبارح من دوري الأبطال هو انهم اكتفوا بنتيجة ماتش الذهاب واعتقدوا ان الأمور محسومة تماماً، وأشد المتشائمين ماكانش يتوقع أبداً ان السيناريو ده ممكن يحصل وعشان كده لازم تتعلم انك تتوقع أي حاجة وماتستهونش بقدرات أي حد مهما كنت شايفه أصغر أو أقل منك.

 

 

3- الاجتهاد: لو ماكانش فريق روما اجتهد بالشكل اللي شفناه امبارح ده فكان هيبقى مستحيل أنهم يتأهلوا، يعني ما ينفعش نقعد ونحط رجل على رجل ونستنى نتايج كويسة لأ لازم نشتغل صح ونتعب عشان نلاقي.

 

4- ما تركزش مع كلام الناس: قبل ماتش العودة بتاع امبارح ده كان كل الناس بيتكلموا عن أن برشلونة رايحين ايطاليا عشان يكسبوا وممكن بنتيجة كبيرة كمان ويصعدوا لقبل النهائي، لكن في النهاية شوفنا ازاي فريق روما قدر انه يكسب 3/0 وهو اللي يتأهل مش برشلونة.

 

5- الانتماء: الانتماء والوفاء ميزة من اكبر مميزات معظم مشجعي كرة القدم، تخيل مثلاً ان امبارح جمهور روما اشترى كل تذاكر الماتش وكانوا ماليين الاستاد وطول ال 90 دقيقة مابطلوش تشجيع خالص، مع ان فريقهم كان خسران في الذهاب 4 و بالتالي فرصهم في الصعود كانت قليلة جداً لكنهم ما بطلوش تشجيع.

 

وأخيراً ماتش امبارح كان فرصة كويسة عشان نشرح للناس ليه احنا بنحب الكورة وليه ممكن نسيب مزاكرتنا وشغلنا عشان نتفرج على ماتشات كبيرة زي دي واللي بتكون كلها إثارة وتشويق ومتعة ودراما.

‫شاهد أيضًا‬

تعاون سوريا وليبيا لمواجهة الغزو العثماني..

تعاون سوريي ليبي مشترك لمواجهة غزو الدكتاتور العثماني اردوغان..   تناقلت وكالات اللان…