‫الرئيسية‬ جوووول عبد الله السعيد.. كفاية “تابوهات”
جوووول - مارس 17, 2018

عبد الله السعيد.. كفاية “تابوهات”

عبد الله خاين، عبد الله بتاع فلوس، راجع نفسك يا عبد الله، الفلوس مش كل حاجة، الأهلي مبيوقفش على لاعب، مش عايزين عبد الله، عبد الله لازم يجدد، لو عبد الله مشي الأهلي هيتعب عشان يجيب بديل، مبروك عبد الله جدد، لأ مش عايزينه يجدد، الأهلي فوق الجميع.

 

أكتر حاجة عجبتني في مسلسل عبد الله السعيد ده، هو إنه فضل ساكت مش بيتكلم في الإعلام، مفيش تصريح منه شخصيًا، عبد الله كان واضح من الأول مع إدارة الأهلي، ده آخر عقد ليا، وجايلي عروض برة معدية المليون ونص دولار، لو هتدفعوا مقابل “قريب” منه هجدد، لو لأ هشوف مصلحتي فين. عبد الله مغلطش في حد، مطلعش يهاجم عدلي القيعي، ولا جمهور الأهلي اللي شتمه، مفكرش يلعب بورقة الزمالك عشان يضغط بيها على الأهلي.

 

بالنسبالي الموقف اللي بيختزل عبد الله السعيد كشخصية قوية ولاعب محترف عارف يفصل بين مشاكل التجديد وإخلاصه للنادي اللي بيلعب ليه، هو ماتش مونانا، اللي جاب فيه جولين وظهر بأداء قوي، رغم إن الوقت ده كان ذروة المشاكل.

 

جمهور الأهلي زعلان من السعيد وده حقه، لاعب مهم في فريقك مش عايز يجدد، لكن ليه تهاجمه وتشتمه؟ ليه مصممين نحط تصنيفات وتابوهات للناس، لو خرجوا منها يبقوا خونة ويستاهلوا ضرب النار؟ من التعليقات اللي شوفتها كتير على صفحات الأهلي على السوشيال ميديا، هو إن إنت يا عبد الله عمرك ما هتكون أبو تريكة، طب افرض حضرتك إنه مش عايز يكون أبو تريكة؟ إنت كجمهور عايز عبد الله يجدد على بياض ويفضل الانتماء على الفلوس ده حقك، لكن في نفس الوقت إنت مش مكانه، هو بيحب الأهلي وأخلصله بس شايف إن مستقبله كمان كذا سنة لما يعتزل مش هيتأمن غير بالطريقة دي، ده حقه.

 

فرانشيسكو توتي، واحد من أعظم اللاعيبة في تاريخ إيطاليا، لعب لروما طول حياته، ورغم عروض مغرية من ريال مدريد وميلان وغيرهم، فضل إنه يكمل مع الفريق اللي بيحبه، نموذج هايل، لكن هل أي نموذج تاني بخلاف ده يبقى كافر وكلب فلوس..إلخ؟

 

اللي أعرفه إنك لما تبقى بوشين وبتلعب على كل الأحبال، هنا يبقى عندك مشكلة، ساعتها كلام زي إنت بتتكبر على النادي اللي نجّمك، يبقى منطقي، لكن عبد الله معملش كدة، والدليل إنه فضل مستني الأهلي، هو كان صريح من البداية، دي مطالبي هتنفذوها هجدد، مش هتنفذوها مش هجدد، بسيطة بس احنا بنحب نعقدها، بنحب نعيش في العالم المثالي، اللي محدش فينا عايش فيه أصلا، أي واحد من الجمهور لو جاله في شغله عرض في شركة أحسن على طول بيقولهم إن مرتبه لو مزادش مش هيكمل، ده مش عيب ولا قلة أصل، في الآخر كله شغل، لاعيب الكورة فعلا مرتبه مش زي أي حد، لكن لاعيب الكورة له عمر افتراضي، لو مكملش بعدها في الإعلام أو الإدارة- ودي حاجة مش مضمونة أبدًا لعبد الله- مش هيبقى عنده مصدر دخل.

 

مش قادر أتصور كلام من صفحات السوشيال ميديا، ومن إعلاميين المفروض إنهم كبار، على إننا في عصر احتراف وكإن الكلمة عيب، الفلوس مش عيب، إنك تأمن مستقبلك ومستقبل عيالك مش عيب، دحنا ياما شوفنا نماذج أسوأ بكتير ومقولناش حاجة، على الأقل الراجل حدد مطالبه ومماطلش، في النهاية عبد الله السعيد جدد للأهلي وبيتهاجم برضو، عشان حاجة معملهاش، عشان حاجة هو مش مسؤول عنها تمامًا، تابوهات الجمهور.

‫شاهد أيضًا‬

السعودية: الحوثيون يتبنون الهجوم على أرامكو بـ10 طائرات درون

85 نقلاً عن BBC أعلنت جماعة الحوثي اليمنية المدعومة من إيران، صباح 14 أيلول/سبتمبر، أنها ا…